Kritik dan saran E-mail ke hkbp_slipi@yahoo.co.id

Ari Hananaek ni Tuhan Jesus


Acara Kebaktian Pagi
Parningotan di Ari Hananaek ni Tuhan Jesus
Kamis, 13 Mei 2010
01.   Joujou tu Parsaoran
(U = Uluan ; H = Huria)
U    :     Hamu angka na hinaholongan. Na marpungu do hita sadarion mamestahon Ari Parningotan Hananaek ni Tuhan Jesus tu banuaginjang. Manaek Ibana tu banuaginjang laho hundul tu siamun ni Amana, dohot laho parade inganan di hita na porsea di Ibana. Mulak Ibana tu haroroanNa hian dung dipasidung ulaonNa di portibi on patupahon haluaon di hita manisia. Sian i ma Ibana sogot ro mangalap hita na porsea laho manean hangoluan na manongtong i. Alani tapahibul ma rohanta laho marsaor dohot Ibana marhite parpunguan on. Tapuji ma Ibana marhite Buku Ende No. 97 : 1 – 3
02.  Marende Huria BE No. 97 : 1-3 “Patimbul be ma sangap”   BL. 129
1.      Ingoton ma sadarion parnaek ni Tuhan Jesus.
Tu habangsaNa na tongtong na so tarbaen be meret.
Tasomba ma Tuhanta i, naung mulak tu AmaNa i, tapuji ma Ibana

2.      Ai nunga mungkap dalan i di angka na porsea,
lao mamongoti surgo i malua sian jea.
Naung mangonai tu sasude na mangulahon dosa i. Pinuji ma Tuhanta.
.....jongjong.....
3.      Ianggo las roham tutu di Jesus i, Tuhanta.
Pauba ma roham burju ihuthon ma Ibana.
Oloi hatana sasude, sai tiru pambaenanNa pe, saleleng ho mangolu.

03.  Votum – Introitus – Tangiang
U    :     Marhitehite Goar ni Debata Ama, dohot Goar ni AnakNa Tuhan Jesus Kristus, dohot goar ni Tondi Porbadia, na manompa langit dohot tano on. Amen. Nunga didok Jahowa mandok Tuhanku : Hundul ma Ho tu siamunHon paima hubahen angka musum sidegedegean ni patMu. Marrongoman bangsoM ro sian lomona di ari parporanganMu, marpahean habadiaon songon nambur sian ampuan ni andostorang.
H    :     Ro do tu Ho paranganMu angka na umposo
U    :     Nunga pola maruari Jahowa jala ndang tagamon solsolanNa rohaNa. Sai Ho do malim ro di salelenglelengna mangihuthon horong ni si Melkisedek. Sai patimbul ma diriM ale Debata, tu atas ni langit hamuliaonMu tu sandok tano on. Haleluya.
H    :     (Mangendehon) Haleluya, haleluya, haleluya
U    :     Martangiang ma hita. Ale Jesus Kristus, Anak ni Na Tumimbul i, naung manaek tu banuaginjang jala hundul tu siamun ni Debata. Suru ma Tondi Porbadia tu rohanami be, asa ibana mangajari rohanami. Lehon ma tu hami Parhalado na burju mangolo i hataM, jala pargogoi nasida asa tongtong mangaradoti ulaonna jala parsahalai nasida mangalo bisuk ni sibolis i, asa tung rarat harajaonMu di sandok portibi on, paima sude musuM peak di toru ni patMu. Sai pamonang ma hami manaluhon dosa dohot hamatean marhitehite Ho, ai Ho do na mangolu dohot na manggonggomi rap dohot Ama i dohot Tondi Porbadia. Amen
.....hundul.....
04.  Marende Huria BE No. 98 : 1 – 2   “Tuhan Debata”   BL. 59
1. Naung manaek do Ho lao tu surgo do. Ale Jesus Rajanami
Ho do ihuthononnami. Ho partogi i lao tu surgo i.

2. Maol do dalan on, togu hami on, asa tung malua hami sian angka musunami
Na di tano on, togu hami on
05.  Patik
U    :     Andorang so manaek Tuhan Jesus, dipatihi do angka siseanNa, didok tu nasida (di Mateus 28 : 19-20), “Laho ma hamu, podai hamu ma saluhut bangso, didi hamu ma nasida tubagasan goar ni Ama, Anak dohot Tondi Parbadia. Laos ajari hamu ma nasida mangaradoti nasa hata naung hupatikkon tu hamu.”
H    :     Ai ida ma, sai na dongananku do hamu ganup ari, rasirasa ro ajal ni hasiangan on,”
U    :     Hamu angka dongan, dilehon Jesus do hatorangan taringot tu hamumulakNa tu banuaginjang, didok tu siseanNa, “Jala laho pe Ahu mangarade inganan di hamu, sai mulak do ahu mangalap hamu, asa rap hamu dohot Ahu”, (Joh 14 : 3). Manaek pe Ibana tu banua ginjang, alai na mulak do Ibana muse tu portibi on laho manguhumi halak na mangolu dohot na mate. I do tahatindangkon di hata haporseaon ponggol patoluhon i :
H    :     Na manaek tu surgo laho hundul tu siamun ni Debata. Disi ma Ibana paima mulak sogot tu tano on manguhumi halak na mangolu dohot na mate.
U    :     Domu tusi do didok Konfessi, Panindangion Haporseaon HKBP Bindu 18, taringot tu “uhum sogot” : Na ro do Tuhan Jesus Kristus di ari parpudi, laho manungguli angka na mate, manguhumi  nasa jolma. Disi ma jouonNa na porsea laho manean hangoluan salelenglelengna. Alai angka na so porsea, laho ma nasida tu na bernit salelenglelengna.
H    :     Hot ma tohap ni na porsea i di lambung ni Debata ro di saleleng ni lelengna.
U    :     Marhite poda on taalo jala tatulak do poda na mandok : na boi do etongetongon ni jolma haroro ni Kristus paduahalihon. Na adong dope parasian dung mate jolma i. Marhite i taparhatopot do na so panagaman do haroro ni Kristus i. Alani  tongtong ma hita hobas managam haroroNa i.
             Antong rap mangido gogo ma hita laho mangulahon patikNa i.
H    :     Ale Tuhan Debata sai pargogoi ma hami mangulahon na hombar tu patikMi. Amen.
06.  KOOR NHKBP
07.   Marende Huria BE No. 539 : 1-2 “Sai Hutagam do Tuhanku”  BL. 371
1.      Sai hutagam do Tuhanku, sai masihol rohangki, di haroro ni Tuhanku songon na nidokNa i. Sai mardongan olopolop, huriaM managam Ho. Maranata, ro, o Tuhan, Amen sai tibu ma ro.
....jongjong....
2.      Las ni roha ndang hapalang do manggohi rohangki, dung binege soaraNa di na ro Tuhanta i. Sai mardongan .....dst......
08.  Tangiang Manopoti Dosa
U    :     Tapaunduk ma rohanta laho manopoti dosanta tu Debata. Martangiang ma hita. Ale Tuhan Debata, Ama ni Tuhan Jesus Kristus naung manaek tu banua ginjang. Marunduk ni roha do hami nuaeng di joloM manopoti dosanami na godang i. Di Parningotannami di hananaekMu tu banua ginjang, huingot hami do angka halembaonnami mangulahon na pinatikhonMi, andorang so manaek Ho tu banuaginjang, disuru Ho do hami mamaritahon GoarMu, hape lupa do hami mangulahon i.


H    :     (mangendehon BE No. 683 : 3 “DiadopanMu Jesus”) DiadopanMu Jesus tarsolsol bagi rohangkon, muba ma au tu jolo on di adopanMu Jesus.
U    :     Tuhan, sai paingot jala pargogoi hami mamaritahon GoarMi. Pargogoi hami mamangke tingki, gogo dohot nasa na adong di hami laho mangarahon dongan mananda Ho Sipalua portibi on. Patau huriaM gabe ulaulaM pararathon harajaonMi, asa lam tamba na porsea di Tuhan Jesus Kristus.
H    :     (mangendehon BE No. 683 : 3 “DiadopanMu Jesus”) DiadopanMu Jesus tarsolsol bagi rohangkon, muba ma au tu jolo on di adopanMu Jesus.
U    :     Ale Tuhan, na parade  inganannami do Ho umbahen manaek tu banuaginjang, jala na ro do Ho sogot manguhumi halak na mangolu dohot na mate. Seangna i Tuhan ngolu na pinasahatMi tu hami molo so partohap hami di inganan na pinaradeMi, ala pabalionMu hami tu paruhuman na selelenglelengna. Alani Tuhan, asi rohaM di hami pargogoi hami asa unang dilalapi portibi on. Sesa dosanami asa unang tarlalap hami diharoroMi. Amen.
H    :     (Mangendehon BE No. 461 : 2 “Songgop Tu Hami”) Suru TondiM paluahon au on, palua ma O Debata. Bereng dagingku, tondingku dison, palua ma o Debata. Dao ma pangambat di soaraMi, hisap ni daging sandok diringki. Na mangarsahi tongtong TondiMi. Palua ma O Debata.
U    :     Tabege ma bagabaga ni Debata taringot tu hasesaan ni dosanta : Tagan di parpiar ni murukku hutabunihon bohingku satongkin maradophon ho, alai marhitehite denggan basa salelenglelengna asianku ho, ninna Jahowa sipalua ho. Hasangapon ma di Debata na di ginjang.
H    :     Amen.
.......hundul.....

09.  Koor Punguan Ina Debora
10.   Marende Huria BE No. 470 : 1 + 4  “Jesus Ho nampuna au”   BL. 317
1.      Jesus Ho nampuna au dohot na adong di au.
Gogo dohot hosangki sahat ma tu tanganMi
4.      Hata nang soarangki sai rajai ma dohot i,
sai denggan huhut sintong baen hatangku sai tongtong

11.    Epistel : Psalm 110 : 1 - 7
U    :     Tajaha ma Epistel di Pesta Parningotan Ari Hananaek sadarion, tarsurat di Psalm 110 : 1-7 : Nunga didok Jahowa mandok Tuhanku : Hundul ma Ho tu siamunhon, paima hubahen angka musuM sidegedegean ni patMu.
H    :     Tongoson  ni Jahowa ma sian Sion tungkot harajaon ni huasomi, antong mangarajai ma Ho di tongatonga ni musuM !
U    :     Marongoman bangsoM ro sian lomoNa di ari parporanganMu marpahean habadiaon, sian ampuan ni andostorang ro do tu Ho nambur ni paranganMu angka na bajar
H    :     Nunga pola maruari Jahowa, jala ndang tagamon solsolanNa bagiNa : Sai Ho do malim ro di salelenglelengna mangihuthon  horong ni si Melkisedek.
U    :     Tuhan i do di siamunmu, Ibana mangalengsehon angka raja di ari panombo ni rimasNa.
H    :     Ibana mandabu uhum di tongatonga ni angka parbegu, Ibana mambahen gok angka bangke; Ibana do mangarosak ulu di tano adaran bidang
U    :     Inumonna ma sian sunge di dalan, ala ni patimbulonna ma muse uluna. Ima sahatna. Martua ma angka na tumangihon Hata ni Debata jala na umpeopsa. Amen.

12.   Koor Punguan Ina
13.   Marende BE No. 199 : 4 -5  “Tibu ma jumpang tingki”  BL. 132
4.   Sai ingot Jesus Tuhanmi na sangap do Ibana. Manaek muse tu surgo i tu lambung ni AmaNa. Inganan hasonangan i rade di ho dibaen disi. Tangihon ma hataNa.
......jongjong.....
5.   Sai ingot Jesus Tuhanmi sai mulak do Ibana. Muse manguhum jolma i tangkas didok hataNa. Pature ma roham tongtong saleleng ho di tano on pasangap ma Tuhanta.
14.   Manghatindangkon haporseaon                                                               .....hundul....
15.   a. Koor Punguan Manna Choir
b. Koor Punguan Ama
16.     Boaboa :  a. Annon dung simpul jamita papungu pelean tu jolo do hita bahen tumpak Pengembangan Masyarakat.
b.      Dung simpul boaboa patupahon Uluan Ni Huria do Pelantikan Seksi-seksi BPH dari Dewan Koinonia, Marturia, dan Diakonia Periode 2010-2012.
c.       Dung Sidung acara kebaktian patupaon do Pembubaran Panitia Diakonia, HUT ke-46 & Natal HKBP Slipi Thn 2009.

17.    Marende Huria BE No.121 : 1  “Jesus, Raja ni Huria”   BL. 97
Jesus Raja ni huria, naporsea nabadia, pasupasu ma au on sai sungguli ma rohangku,
mangihuthon Ho Rajangku, pargogo i ma au tongtong, pargogoi ma au tongtong.

............(Roma tu jolo setiap Ketua Seksi-seksi BPH).............

18.   Pelantikan Seksi-seksi BPH HKBP Slipi Periode 2010-2012
19.   Marende Huria BE No. 140 : 3 – 4  “Girgir ma hamu”   BL. 141
3.  Radoti burju hataNa sude, sai monang hamu baenonNa muse
     Ibana do Raja na tong monang i, torop pe alona sumurut do i

  1. Asi ma rohaM, ale Debata, pasaut ma hataM, tumpahi nama
Sude na niula ni naposoMi, sai baen ma martua sude jolma pe

20.   Oratorim Punguan Lansia
21.   Marende Huria BE No. 99 : 1.... “O Tondi Parbadia i, bongoti” (Pelean 1a + 1b)  BL. 206
1.      O Ulu balang na gogo songon sadaraion do Ho manaek tu hasangapon. Naung sidung do ulaonMi, na ringkot patupaonMi humophop hajolmaon. Sabam, tongam do Ho muli tu na uli marhabangsa disiamun ni Jahowa.
2.      Marloksaloksa serapim marriburibu Kerubim mamuji Ho na monang dibaen naung pinadomuMi saluhut manisia i tu Debata di ginjang. Puji, puji Jesus Kristus naung patulus saluhutna tinonahon ni amaNa.
3.      O Jesus Ho do ulu ni saluhutna na porsea i, ruasMu anggo hami. Ho hangoluannami on, Ho hasonangannami on, Ho hagogoonnami. Suru, togu, rohanami asa hami mangalehon tu Ho nasa hasangapon.


22.   Jamita : Lukas 24 : 44 – 53
23.   Marende Huria BE No. 100 : 1... “Bongoti ma rohangku”  (Pelean II)   BL. 155
1.      Mardongan olopolop manaek Tuhanta i. Jinangkon ni na torop surusuruan i.
Antong nang hita pe, tapuji ma Tuhanta, marendeende hita marolopolop be.

2.      Na mulak do Tuhanta tu habangsaNa i. Tu lambung ni amaNa di siamunNa i.
Disomba sasude na di banuaginjang Tuhanta i na monang ro sian tano i.

3.      Tatimbang ma lapangna umbaen na songon i ; ai naeng ma dohot hita tumopot surgo i.
Antong taingot ma : Ianggo Tuhan Jesus, Ibana do patulus, nidok ni Debata.

4.      Ditaon do hamatean, humophop hita on. Pature pardalanan na sian tano on. Manogu hita be tu lambung ni AmaNa. Disi diadopanNa naeng sahat sasude.
........jongjong......
24.  Tangiang Penutup
U    :     Tasombahon ma peleanta on tu Debata, martangiang ma hita : Ale Debata Amanami na di banua ginjang, hupuji hami ma Ho, ala saut sude tahiM naung sinangkapanMu andorang so ojak dope hasiangan on. Pujionnami ma Ho ala naung monang Jesus Kristus Tuhannami maralohon portibi on, jala dipabangkit Ho Ibana gabe Raja di atas ni saluhut. Ndang adong be sihabiarannami, nunga pos rohanami manaluhon portibi on. Angkup ni pujionnami ma Ho, ala dipasupasuhon Ho tu hami angka silehonlehon na denggan na huparhaseang hami di ngolunami. Sian na nilehonMi hupasahat hami nuaeng gabe sombanami tu Ho. Jalo ma i jala pasupasu asa manumpak tu pangkobasion ni HuriaM laho pararathon harajonMi tu luat ni na so mananda Ho dope. Marhitehite Kristus Jesus Sipalua i, martangiang hami tu Ho. Amen
H    :     (Mangendehon BE No 303 : 2  “O Jesus Sondang Ni Jahowa”)
             Tung aha di rohaM huboan peleanMu, tu asi ni rohaM hubonom ma rohangku. Nang tondi daging pe manipat ari on. I ma peleanMi, na asing ndang adong.

U    :     (Agenda HKBP).....
H    :     (mangendehon ) Ai ho do nampuna Harajaon ........dst................
U    :     Dipasupasu ...........dst.................
S     :     Amen, Amen, Amen....                                                               .......hundul......

25.   Pembubaran Panitia Diakonia & HUT ke-46 dan Natal HKBP Slipi Thn 2009
*TUHAN YESUS MEMBERKATI*
~~~~***~~~~

  • Digg
  • Del.icio.us
  • StumbleUpon
  • Reddit
  • RSS